Tá An Siopa Leabhar, lár-ionad leabhar agus stáiseanóireachta na Gaeilge, ar oscailt arís in ionad nua tar éis a dhúnta.
Dúnadh oifig Chonradh na Gaeilge ar 6 Sráid Fhearchair, ina raibh An Siopa Leabhar lonnaithe ann cheana, ag deireadh mhí Mheáin Fómhair na bliana seo. Tá an sean-ionad in ainm is a bheith dúnta ar feadh tréimhse trí bliana le hathchóiriú a dhéanamh air.
Tuigtear go mbeidh an Siopa Leabhar lonnaithe san ionad nua sin – atá ar Shráid Camden Íochtarach – go dtí go mbeidh an athchóiriú críochnaithe.
I ráiteas a cuireadh amach ar a leathanach Instagram, d’fhógair an siopa go bhfuil “forbairt mhór le teacht ar Uimhir 6 Sráid Fhearchair san am atá romhainn”.
“Tá Oifig na nOibreacha Poiblí ag tosú ag athchóiriú an fhoirgnimh go luath. Le gur féidir leo an obair mhór seo a dhéanamh, caithfidh muid an foirgneamh a fhágáil ar feadh tamall de bhlianta.”
“Táimid fíorbhuíoch as an bhfoighne atá léirithe ag ár gcustaiméirí agus ár soláthraithe le linn na tréimhse dúnta, tréimhse a bhí dúshlánach ar a lán lán bealaí. Táimid ag tnúth go mór le fáilte a chur romhaibh san ionad nua seo.”
I ráiteas ar leathanach Instagram an Siopa dúirt Gráinne Ní Mhuilneoir, Bainisteoir an Siopa, “Cé go bhfuil an spás nua seo beag, táimid ag súil le leas a bhaint as, agus atmaisféar an tsiopa athlonnaithe againn.”
“Beimid i mbun forbairtí beaga eile sna míonna amach romhainn freisin.”
Tá rochtain ar earraí ón Siopa ar líne chomh maith leis an ionad fisiciúil nua.
