Mar is eol do pháirtithe leasmhara ollscoile agus breisoideachais, tá an tuairisc Cassell curtha i bhfeidhm ag an rialtas ar an mhallchéim.
An tseachtain seo, d’fhógair an tAire Breisoideachais Simon Harris a phlean le moltaí maidir le maoiniúchán i gcomhair ardoideachas, bunaithe ar thuairisc Cassell, a chur os comhair an rialtais roimh deireadh na bliana.
Foilsithe i 2016, rinneadh machnanh arís agus arís eile ar na trí rogha a bhí molta leis an ghearchéim a réiteach agus cuireadh iad chuig an Choimisiún Eorpach fiú le haghaidh anailíse eacnamaíochta – rogha a mheastar ag na mílte mar iarracht moill a chur ar cinneadh a dhéanamh maidir leis an tuairisc.
Ach is mó an t-athrú atá tagtha ar riocht ollscoileanna agus colaistí na hÉireann le sé bliana anuas. Ar bhealach, tá tuairisc Cassells fágtha ina ndiaidh ag na hollscoileanna trí modhanna eile maoiniúchán a fháil – ó chíos mac léinn a ardú go bheith ag brath ar shíntiúis ó chéimithe.
Is deacair a bheith dóchasach maidir leis na roghanna atá ar fáil don Áire. Cé gúr údár misnigh é go bhfuil Harris go mór i gcoinne iasachtaí mac léinn a thabhairt isteach – an rogha is conspóidí sa tuarascáil – ardaíonn sé an cheist, go réalaíoch, cad é a dhéanfaidh rialtas Fine Gael-Fianna Fáil-Comhaontas Glas ina áit? D’fhéadfadh siad a mholadh taillí a ísliú, ach ní dócha go gcuirfeadh Fine Gael, go háirithe, a ainm le deireadh iomlán le taillí ollscoile.
Agus in ainneoin argóint Harris go bhfuil méadú de leath-bhilliún euro tagtha ar mhaoiniú san earnáil ardoideachas, tá méadú tágtha ar líon na mac léinn ó shin, go háirithe leis na háiteanna breise ar fad atá á thabhairt isteach chun déileáil leis an éileamh. Tá maoiniú tite go mór chun deiridh ar an méid atá de dhíth.
Tá ceist Cassells imithe chun leadráin de dheasca freagairt leamh ó roinnt rialtais i ndiaidh a chéile – ní raibh sé fiú i gClár an Rialtais anuraidh.
Má tá Simon Harris ábalta athbheochan a dhéanamh ar Cassells le plean láidir don ardoideachas nuair a chuireann sé a chuid moltaí i láthair don rialtas, bail ó Dhia air! Ach, dá dtogródh a pháirtí fíor-athchoiriú a dhéanamh ar an dóigh a mhaoinítear an t-ardoideachas, dhéanfaí é faoin am seo.
