Dar le leathanach Caidrimh Domhanda ar shuíomh idirlín an choláiste, “Tá Coláiste na Tríonóide tiománta chun cinntiú go mbíonn taithí dearfach ag gach mac léinn idirnáisiúnta le linn a chuid stáidéir, agus go mbaineann siad gach tairbhe as saol an choláiste”.
Chun a cháil idirnáisiúnta mar scoth-ollscoil a chaomhnú, in aghaidh ghéarchéim maoinithe in ardoideachas in Éirinn, beidh cumas Coláiste na Tríonóide chun na mac léinn is fear ar fud an domhain a mhealladh ríthábhachtach.
Ní cúis mhór iontais do phobal na Tríonóide, áfach, a bheidh sa scéal le linn na seachtaine go bhfuil ceithre oiread níos mó seans go mbainfidh mic léinn idirnáisiúnta sa choláiste úsáid as a sheirbhísí comhairleoireachta. Tá líon na mac léinn idirnáisiúnta méadaithe faoi dhó le sé bliana, agus tá amhras faoi chumas an Choláiste leis tacaíocht a sholáthar mar atá ag teastáil ó mhic léinn idirnaisiúnta chun an taithí a ghealltar dóibh a bheith acu.
Ní féidir ach an oiread séanadh go mbíonn an Tríonóid, agus é ag iarraidh iarmhairtí an ghéarchéim maoinithe a chosc, ag caitheamh leis an dream idirnáisiúnta mar thálaithe airgid. Cé go ndeachaigh an Coláiste siar ar a chinneadh anuraidh chun méadú cúig faoin gcéad a chur ar tháillí idirnáisiúnta anuraidh, is ríshoiléir le tamall go bhfuil na mic léinn seo agus a gcuid airgid á n-úsaid mar sceach i mbéal bearna.
Bheadh sé mí-ionraic neamhaird a thabhairt ar na cúiseanna éagsúla, leis an bhrú a thagann le bheith ar shiúil ón bhaile mar shampla, gur dócha go bhfuil seirbhísí sláinte an choláiste ag teastáil níos mó ó mhic léinn idirnáisiúnta ná ón ghnáthmhac léinn.
Ach má tá an Tríonóid chun bhrath ar mhic léinn idirnáisiúnta chun a scoth-cháil a chaomhnú, caithfidh sé na tacaíochtaí agus na seirbhísí is dual do scoth-ollscoil a chur ar fáil. Is é sin le rá ná beidh air tuilleadh infheistíochta a sholáthar má tá sé chun caitheamh le mic léinn idirnáisiúnta mar fhoinse airgid, rud atá íorónta.
Agus gan an infheistíocht i seirbhísí comhairleoireachta atá ag teastáil chun freastal ar riachtanais a chuid mic léinn idirnáisiúnta atá ag fás, ní dhéanfaidh an coláiste ag dochar dá cháil idirnáisiúnta sa deireadh.
